ಸ್ವಗತ -2

ಮತ್ತೊಂದು ಆಗಸ್ಟ್ ಹದಿನೈದು ... ಅಗೋ ಎಷ್ಟೊಂದು ಸಮಸ್ಯೆಗಳು ಇನ್ನು ಹಾಗೇ ಇವೆ...ಈಗ ಅರುವತ್ತಾರನೆಯ ಆಚರಣೆ...
ಭಾಷಣಕ್ಕೆ ಮೀಸಲಾದ ದಿನವಿದೇನೋ?...ಸಮಸ್ಯೆಗಳ ಕುರಿತು ಸಾವಿರ ಮಾತು....ಅಷ್ಟೇ ,ಮತ್ತೇನೂ ಇಲ್ಲ...ವಾಕ್ಚಾತುರ್ಯಕ್ಕೆ ಇಲ್ಲಿ ಬರವಿಲ್ಲ..ನುಡಿಯುವುದು ಮಾತ್ರ,ನಡೆಯಲ್ಲೇನೂ ಇಲ್ಲ!
ಇಲ್ಲಿ ರಾಜಕೀಯ ಬಣ್ಣ ಪಡೆವ ಹೋರಾಟಗಳು...ಜನಸೇವೆಯ ಮುಖವಾಡದ ಹೆಗ್ಗಣಗಳು...ಲೆಕ್ಕವಿಲ್ಲದಷ್ಟು ಪಕ್ಷಗಳು...ಬ್ಯುಸಿನೆಸ್ಸ್ ಆದ  ಆಡಳಿತ..ಸ್ವಜಾತಿ ಪ್ರೇಮಿಯ ಬಾಯಲ್ಲಿ ಜಾತ್ಯಾತೀತ ಜಪ!
ವರುಷಕ್ಕೊಮ್ಮೆ ಧ್ವಜ ಹಾರಿಸಿ,ಯಾರೋ ಬರೆದ ಭಾಷಣ ಓದುವ ಮಂತ್ರಿಗಳು..ಗೊಂದಲದ ಮತದಾರ!
ಕಿರಿಯರ ಶಾಲೆಗಳಲ್ಲಿ ಧ್ವಜ ಹಾರಿಸಿ ಸಂಭ್ರಮ..ಮಿಠಾಯಿ ಹಂಚಿ ಬಾಯಿ ಸಿಹಿ ಮಾಡಿ...ಭಾಷಣ,ನಾಟಕ,ಹಾಡು ಕಾರ್ಯಕ್ರಮ ದೇಶಪ್ರೇಮ ಉಕ್ಕಿಸುವ ಕೆಲಸ..
ಕಾಲೇಜು ಕಛೇರಿಗಳಿಗೆ ರಜೆ..ಅಲ್ಲಿಲ್ಲಿ ಸುತ್ತಾಟ,ಚಾರಣ,ಸಿನಿಮಾ ಮೋಜು, ಮಸ್ತಿ ಮಜಾ..ಎಲ್ಲಾ ಕೆಲಸದಿಂದ ವಿರಾಮ!
ಮಿತಿ ಮೀರಿದ ಭ್ರಷ್ಟಾಚಾರ...ಮರಿ ಹಾಕುತ್ತಿರುವ ಕಪ್ಪು ಹಣ...ಏನೇ ಆದರೂ ನೋಟಿನಲ್ಲಿ ನಗುತ್ತಿರುವ ಅಹಿಂಸಾವಾದಿ!!
ಯಾವುದೇ ವೈಯಕ್ತಿಕ ಆಸೆಗಳಿಲ್ಲದೆ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಹೋರಾಡಿ ಪ್ರಾಣತೆತ್ತ ಹುತಾತ್ಮರ ನೆನೆಯಬೇಕಾದ ದಿನದಂದು ಪ್ರತಿ ವರ್ಷ ನಾವು ಸಮಸ್ಯೆಗಳ ಬಗ್ಗೆ ಮಾತಾಡಬೇಕಾದ ದುಸ್ತಿತಿ!
ಹೀಗೆಯೇ ಯೋಚಿಸುತ್ತಾ ಹೇಳುತ್ತಿರುತ್ತೇವೆ "ಸ್ವಾತಂತ್ರ್ಯ ದಿನಾಚರಣೆಯ ಶುಭಾಷಯಗಳು"!!

 ಚಿತ್ರ ಕೃಪೆ:http://jaipursightseeing.com  

---------------------------------------------------------------------------------------------------------------------------------------------------------------

ಸ್ವಗತ -1

ಕವಿ ಅಥವಾ ಲೇಖಕ ಅವನವನ ಧಾಟಿಯಲ್ಲೇ ಯೋಚಿಸುತ್ತಾನೆ, ಅಂತೆಯೇ ಬರೆಯುತ್ತಾನೆ, ಅದು ಕೆಲವರಿಗೆ 'ಕಾಲಹರಣ' ಎಂದೆನಿಸಿ ಗೊಣಗಬಹುದು, ಕೆಲವರಿಗೆ 'ತಮಾಷೆ' ಎಂದೆನಿಸಿ ಅಪಹಾಸ್ಯ ಮಾಡಬಹುದು.ಎಲ್ಲರ ದೃಷ್ಟಿಕೋನಗಳು ಬೇರೆ ಬೇರೆಯಾಗಿರುತ್ತವೆ ;ಬರೆದುದನ್ನು ಯಾರೂ ಓದುವುದಿಲ್ಲ ಅಥವಾ ಯಾರಾದರೂ ತಮಾಷೆ ಮಾಡುತ್ತಾರೆ ಎಂದೆಲ್ಲಾ ಅನ್ನಿಸತೊಡಗಿದರೆ ಬರೆಯಲು ಆಸಕ್ತಿಯೇ ಇರುವುದಿಲ್ಲ.ಅಕ್ಷರಮೋಹಿಯಾಗಿ,ಪದಗಳ ಒಲವನ್ನು ಸಂಪಾದಿಸಿ,ಆತ್ಮತೃಪ್ತಿಗಾಗಿ ಬರೆಯುವುದನ್ನು ವಾಡಿಕೆ ಮಾಡಿಕೊಂಡರೆ ಬರೆದ ಎಲ್ಲಾ ಸಾಲುಗಳಲ್ಲೂ ಅತೀವ ಆನಂದ ದೊರೆಯುತ್ತದೆ. ನಮಗೆ ನಿರಂತರ ನೆಮ್ಮದಿ ನೀಡುವುದು ನಮ್ಮತನ ಮಾತ್ರ!
-----------------------------------------------------------------------------------------------------------------------------------------------------
ಕನ್ನಡ ಬ್ಲಾಗ್ ಪುಟದಲ್ಲಿ....(comments @KANNADA BLOG- facebook page)...

ಹರುಷಕ್ಕೆ...ಹಾರೈಕೆ

ಎಲ್ಲರಿಗೂ ಹೊಸವರ್ಷದ ಹಾರ್ದಿಕ ಶುಭಾಷಯಗಳು...ಎಲ್ಲರ ಹೊಸ ಯೋಚನೆ,ಯೋಜನೆಗಳು ಸಫಲವಾಗಲಿ.

"ಈ-ಕನಸು" ಕನ್ನಡ ಪತ್ರಿಕೆಯಲ್ಲಿ ಪ್ರಕಟವಾದ ಹೊಸವರ್ಷದ ಕುರಿತ ನನ್ನ ಲೇಖನ ಇಲ್ಲಿದೆ..

------------------------------------------------------------------------------------------
ಕ್ಯಾಲೆಂಡರ್ ಬದಲಿಸುವ ಸಮಯ ಮತ್ತೆ ಬಂದಿದೆ...ಜನವರಿ 2011!!
ಅಂತೂ ಹಳೆಯ ವರ್ಷಕ್ಕೆ ವಿದಾಯ ಹೇಳಿ ಹೊಸ ವರ್ಷಕ್ಕೆ ಅದ್ಧೂರಿ ಸ್ವಾಗತ ಸಿಕ್ಕಿದೆ..
ಮೊನ್ನೆ ಮೊನ್ನೆ ಶುರುವಾಗಿದ್ದು ಅಲ್ವಾ ಅಂತ ಅನಿಸುವ 2010ರಲ್ಲಿ ಒಂದಷ್ಟು ಒಳ್ಳೆಯದು...ಹಾಗೂ ಇನ್ನೊಂದಿಷ್ಟು ಘಟಿಸಬಾರದಂತಹ ಘಟನೆಗಳು ಆಗಿ ಹೋಗಿವೆ.ವಾರದಿಂದೀಚೆಗೆ ದಿನ ಪತ್ರಿಕೆಗಳಲ್ಲಿ ,ಟಿ.ವಿ.ಮಾಧ್ಯಮಗಳಲ್ಲಿ ಇವುಗಳ ವಿಮರ್ಶೆ ಆಗಿದೆ..ಆಗುತ್ತಿದೆ.ತನ್ನ ಅಪರಿಮಿತ ಬುದ್ಧಿಶಕ್ತಿಯಿಂದಾಗಿ ಆದಿಮಾನವ ಸ್ಥಿತಿಯಿಂದ ಕಂಪ್ಯೂಟರ್ ಯುಗದಲ್ಲಿರುವ ನಾವು,ಇಡೀ ವಿಶ್ವವೇ ಬೆರಳ ತುದಿಯಲ್ಲಿ ಎನ್ನುವ ಈ ಸ್ತಿತಿ ತಲುಪಿರುವ ನಾವು,ಈ ನಡುವೆ ಇಂತಹ ಸಹಸ್ರಾರು ವರ್ಷಗಳನ್ನೇ ದಾಟಿ ಬಂದಿದ್ದೇವೆ.ಇಂದು ಇಂದೆನ್ನುವ ಈ 'ಇಂದು' ನಾಳೆ 'ನಿನ್ನೆ'ಯಾಗುತ್ತದೆ ಎಂಬುದು ನಮಗೆಲ್ಲಾ ತಿಳಿದಿದೆ.
ಹೆಸರಿಲ್ಲದೆ ಹುಟ್ಟುವಲ್ಲಿಂದ,ಆ ಹಸುಗೂಸಿನ ಸ್ತಿತಿಯಿಂದ ನಾವು,ನಮ್ಮ ವ್ಯಕ್ತಿತ್ವ ಬೆಳೆಯುತ್ತ ಹೋಗುತ್ತದೆ;ಅನೇಕ ಘಟನೆಗಳು,ವಿಚಾರಗಳು,  ಅನುಭವಗಳನ್ನು ಮನಸ್ಸಿನಲ್ಲಿ ಮುದ್ರಿಸಿಕೊಂಡಿರುತ್ತೇವೆ ನಿಜ-ಆದರೆ ಮನಸ್ಸಿನ ಅಂತರ್ಯದಲ್ಲಿ ನಿಕ್ಷಿಪ್ತವಾಗಿರುವ ಇಂತಹ ವಿಚಾರ,ಅನುಭವಗಳಿಂದ ನಾವು ಕಲಿತಿರುವುದು ಏನು ಎಂಬುದು ಪ್ರಮುಖ ವಿಷಯ!!ಪುಣ್ಯವೋ ಪಾಪವೋ ಗೊತ್ತಿಲ್ಲ ...ಅಂತೂ ಈ ಭೂಮಿ ಮೇಲೆ ಹುಟ್ಟಿದ್ದೇವೆ,ಸಮಯದ ಉರುಳುವಿಕೆಯಲ್ಲಿ ಬದುಕು ಕಟ್ಟಿಕೊಳ್ಳುವುದು,ಕನಸನ್ನು ನಿಜಮಾಡಿಕೊಳ್ಳುವುದು ಹೀಗೆ ಅನೇಕ ಅಗತ್ಯಗಳನ್ನು ಪೂರೈಸುವಾಗ ಶಾಲೆ,ಕಾಲೇಜು, ಉದ್ಯೋಗ,ಸಂಸಾರ ಎನ್ನುತ್ತಾ ದಿನ ಕಳೆಯುತ್ತದೆ.ಒಂದು ದಿನ ಬದುಕೇ ಮುಗಿದು ಹೋಗುತ್ತದೆ!ವೇಗದ ಜಗತ್ತಿನಲ್ಲಿರುವ ನಾವು ಸಾಮರ್ಥ್ಯ ಕಡಿಮೆಯಾಗುವುದೋ,ಆರೋಗ್ಯ ಕುಗ್ಗುವುದೋ,ಅಸಹಾಯಕನೆನಿಸಿಕೊಳ್ಳುತ್ತೇನೋ,ಅಂದುಕೊಂಡಿದ್ದನ್ನು ಸಾಧಿಸುತ್ತೇನೋ ಇಲ್ಲವೋ ಎಂಬ ಋಣಾತ್ಮಕ ಅಂಶಗಳನ್ನು ‘ಇಲ್ಲ ಹಾಗಾಗದಂತೆ ನಡೆದುಕೊಳ್ಳಬೇಕು..’ಎಲ್ಲ ಕ್ಷಣಗಳನ್ನು ಶುಭವೆಂದು ಖುಷಿಯಿಂದ ಅನುಭವಿಸಬೇಕೆಂಬ ಧನಾತ್ಮಕ ಚಿಂತನೆ ಅದ್ಭುತ...ಅಲ್ವಾ? ಹೊಸವರ್ಷದಲ್ಲಿ ಆ ಖುಷಿ ಎಲ್ಲರದಾಗಲಿ!

ಅಂದುಕೊಂಡಂತೆ ನಡೆದರೆ ಅದು ಪ್ರತಿಭೆ,ಕಷ್ಟದ ಫಲ ಎಂದೂ,ಇರದಿದ್ದರೆ ನಮ್ಮ ವಿಧಿಯೆಂದೂ ಭಾವಿಸುವುದು ನಮಗೆ ಹವ್ಯಾಸವಾಗಿದೆ.ಆದರೆ ನಾವು ನೆನಪಿಟ್ಟುಕೊಳ್ಳಬೇಕಾದ ಒಂದು ವಿಚಾರವೆಂದರೆ ‘ಸ್ವನಿಂದೆ ಮತ್ತು ಸ್ವಪ್ರಶಂಸೆ’ ಇವೆರಡೂ ಕೆಲಸಕ್ಕೆ ಬಾರದವು ಎಂಬುದು.ನಾವು ಪ್ರಾವಿಣ್ಯಯನ್ನು ಪಡೆದಿರುವ ಕ್ಷೇತ್ರವನ್ನು ಅಥವಾ ನಮ್ಮೆಲ್ಲರಲ್ಲೂ ಅಡಕವಾಗಿರುವ ಅಗಾಧ ಪ್ರತಿಭೆಯಿಂದ ನಾವು ಸಾಧಿಸಬಹುದು ಎನ್ನುವ ಕೆಲಸಕಾರ್ಯಗಳನ್ನು ಮಾಡುವುದರಿಂದ ಸಂತೃಪ್ತಿ ಪಡೆಯಬಹುದು ...ಅಲ್ವಾ!?ಹೊಸವರ್ಷದಲ್ಲಿ ಆ ಸಂತೃಪ್ತಿ ಎಲ್ಲರದಾಗಲಿ!!

ನಮ್ಮ ಕೈಯಲ್ಲಿಲ್ಲ ,ಕಳೆದರೆ ಮತ್ತೆ ಸಿಗುವುದಿಲ್ಲ ಎಂದು ನಾವು ಕರೆಯುವ ಈ 'ಸಮಯ' ಎನ್ನುವುದಿದೆಯಲ್ಲ ಇದು ಬದಲಾಗು ವಂತದ್ದು ಎಂಬುದರ ಅರಿವು ನಮಗಿದೆ ಸರಿ-ಬದಲಾಗುವ ಸಮಯ/ಕಾಲದಲ್ಲಿ ಸಮಸ್ಯೆ ಎಂಬುದು ಶಾಶ್ವತವಲ್ಲ ಎಂದು ಮನವರಿಕೆಯಾದರೆ ಜೀವನದಲ್ಲಿ ಎಷ್ಟೊಂದು ನೆಮ್ಮದಿ ಅಲ್ವಾ...?ಆ ನೆಮ್ಮದಿ ಎಲ್ಲರದಾಗಲಿ !!

ಬಹುಸುಂದರ ಗುಲಾಬಿ ಹೂವು ಇರುವುದು ಮುಳ್ಳಿನ ಗಿಡದಲ್ಲಿ!ನಮ್ಮಲ್ಲಿ ಕೆಲವರು ಆ ಹೂವಿನ ಸೌಂದರ್ಯವನ್ನು ಆಸ್ವಾದಿಸಿದರೆ ,ಇನ್ನು ಕೆಲವರು ಮುಳ್ಳಿನ ಬಗ್ಗೆಯೇ ಯೋಚಿಸುತ್ತಾರೆ.ಹೀಗೆ ಒಂದೇ ವಿಷಯದ ಬಗ್ಗೆ ನಾವು  ಆಲೋಚನೆಗೆ ಅನುಗುಣವಾಗಿ ಸ್ಪಂದಿಸುವ ರೀತಿಯೇ ಎಷ್ಟೊಂದು ವಿಚಿತ್ರ.ಹೀಗೆ ದುಷ್ಟ ಯೋಚನೆಗಳಿಂದ, ಭಯ+ಉತ್ಪಾದನೆಗಳಿಂದ, ರಕ್ತಹೀರಿ,ಅಮಾನುಷವಾಗಿ ಬದುಕಬೇಕೆನ್ನುವವರಿಗೆಲ್ಲ ಆ ದೇವರು ಸದ್ಭುದ್ದಿ ನೀಡಿ,ಅದರಿಂದ ಸಾಧಿಸುವುದು ಏನೂ ಇಲ್ಲ ಎಂಬುದು ಅವರಿಗೆ ಮನದಟ್ಟಾಗಿ,ಅವರ ಪ್ರಜ್ಞೆಯನ್ನು ಕೆದಕಿ ಅವರೂ ಉತ್ತಮರಾಗಲಿ..ಹೊಸವರ್ಷ ವಿಶ್ವದೆಲ್ಲೆಡೆ ಶಾಂತಿ ತುಂಬಿರಲಿ!

ನಗು ದೇವರು ನಮಗೆ ಕೊಟ್ಟಿರುವ ಅತ್ಯದ್ಭುತ ವರ! ವೃತ್ತಿಪರ ಒತ್ತಡಗಳಿಂದ ನಗು ಬಹುತೇಕ ಕಾಣೆಯಾಗಿವುದು ನಿಜ.ಆದರೆ ನಮಗೆಲ್ಲ ಆರೋಗ್ಯಕರ ನಗು ಆರೋಗ್ಯಕ್ಕೆ ಸಹಕಾರಿ! ಕಲ್ಮಶವಿಲ್ಲದ ನಗು ಮುಖದಲ್ಲಿ ಅಂದ ಆನಂದವಾಗಿ ಅರಳಿ ಹೊಳೆಯುತ್ತದೆ,ಅದಕ್ಕೆ ನಗು ಸೌಂದರ್ಯವನ್ನು ಹೆಚ್ಚ್ಚಿಸುತ್ತದೆ ಎನ್ನುವುದು ಏನೋ?ಹೊಸವರ್ಷ ನಗುವಿನಿಂದ ತುಂಬಿರಲಿ,ಆ ನಗು ಇನ್ನೊಬ್ಬರ ನೋವಿಗೆ ಕಾರಣವಾಗದಿರಲಿ...ನಗು ಸ್ವಚ್ಚವಾಗಿರಲಿ !!

ಹಣಕ್ಕೆ ಹಣವನ್ನು ಸಂಪಾದಿಸುವ ಗುಣವಿದೆ...ಉಪಯೋಗಿಸುವ ವಿಧಾನ ಹಾಗೂ ಉಳಿಸಿಕೊಂಡದ್ದು ಮಹತ್ವವನ್ನು ಪಡೆದುಕೊಳ್ಳುತ್ತದೆ,ಬರೀ ಗಳಿಸಿದ್ದಷ್ಟೇ ಅಲ್ಲ !ಹಾಗೆಯೇ ಸ್ನೇಹಕ್ಕೆ,ಪ್ರೀತಿಗೆ ಅನೇಕರನ್ನು ಸಂಪಾದಿಸುವ ಗುಣವಿದೆ,ಬರೀ ಸಂಖ್ಯೆಯ ಲೆಕ್ಕಚಾರವಾಗಿರದೆ..ಎಲ್ಲರಿಗೂ ಒಳ್ಳೆಯ ಸ್ನೇಹಿತರು ಸಿಗಲಿ!!

ಹೊಸ ವರುಷ ಹರುಷವನ್ನು ತರಲಿಯೆಂದು ಪ್ರತಿ ವರ್ಷ ಮಾಡುವ ಶುಭಾಶಯಗಳು ಬರೀ ಶುಭಾಶಯದ ಮಾತುಗಳಷ್ಟೇ ಆಗದಿರಲಿ !!
2011 ಎಲ್ಲರಿಗೂ ಖುಷಿ,ಸಂತೃಪ್ತಿ,ನೆಮ್ಮದಿಯನ್ನು ತರಲಿ....ಒಳಿತಾಗಲಿ ಶುಭವಾಗಲಿ ಎಂಬ ಶುಭ ಹಾರೈಕೆಯೊಂದಿಗೆ ನಾವೆಲ್ಲಾ ಹೊಸವರ್ಷವನ್ನು ಸಂಭ್ರಮದಿಂದ ಸ್ವಾಗತಿಸೋಣ..ಅರ್ಥಪೂರ್ಣವಾಗಿಸೋಣ...


---ವಿನೋದ್ ರೈ ,ಕರ್ಮಾಯಿ 
------------------------------------------------------------------------------------------

ಮುದ್ದು !!!

ಮುದ್ದು ...ಹೆಸರು ತುಂಬಾ ಮುದ್ದಾಗಿದೆ ಅಲ್ವಾ..!!!ಹೆಸರಿನಷ್ಟೇ ಮುದ್ದಾಗಿದೆ ಅವಳು ಬರೆಯುವ ಕವಿತೆಗಳು!!ನಾನು ಹೇಳ್ತಾ ಇರುವುದು ಹನ್ನೆರಡು ವರ್ಷದ ಪುಟಾಣಿ ಕವಯಿತ್ರಿ ಬಗ್ಗೆ..ಊರು ತೀರ್ಥಹಳ್ಳಿ..ಸದ್ಯ ಏಳನೇ ತರಗತಿಯ ವಿದ್ಯಾರ್ಥಿನಿ..ಆದರೆ ಇವಳು ಬರೆಯುವ ಕವನ ಲೇಖನ,ಕವನಗಳನ್ನು ಓದಿದಾಗ ನಿಮಗೆ ಇದು ಪುಟಾಣಿ ಹುಡುಗಿ ಬರೆದದ್ದಾ? ಎಂದು ಅನಿಸುತ್ತದೆ.. ಅವಳ ಕಲ್ಪನೆಗಳು ಅವಳು, ಬಳಸುವ ಶಬ್ದಗಳು ಎಲ್ಲವೂ ವಿಷೇಷ ವಾಗಿವೆ!ಎಲ್ಲಾ ಮಕ್ಕಳೂ ಇಂಗ್ಲೀಷ್ ಮೀಡಿಯಂಗೆ ಹೋಗ್ತೀನಿ ಅಂತಿದ್ರೆ ..ಇವಳು ಇಂಗ್ಲಿಶ್ ಮೀಡಿಯಂ ಶಾಲೆ ಬಿಟ್ಟು ಕನ್ನಡ ಮಾಧ್ಯಮ ಶಾಲೆ ಸೇರಿದ್ದಾಳೆ ಅಂತೆ..ತಾನು ಬರೆದ ಕತೆ,ಕವನ,ಲೇಖನಗಳನ್ನು ಬೇರೆ ಬೇರೆ ಪತ್ರಿಕೆಗಳಿಗೆ ಕಳುಹಿಸುತ್ತಿದ್ದಳು.ಅದು ಪ್ರಕಟಗೊಳ್ಳದೆ ಇದ್ದಾಗ ಬೇಜಾರಾಗಿ;ಅವಳೇ ಸ್ವಂತ ಪತ್ರಿಕೆಯನ್ನು ಪ್ರಾರಂಭಿಸುವ ಯೋಜನೆ ರೂಪಿಸಿದಳು ..ಈಗ ಕೈಬರಹದಲ್ಲಿ ಒಂದು ದ್ವೈಮಾಸಿಕ ಪತ್ರಿಕೆ ಪ್ರಕಟಿಸುತ್ತಿದ್ದಾಳೆ..ಪತ್ರಿಕೆಯ ಹೆಸರು 'ಮಂದಾನಿಲ "...ಎಷ್ಟೊಂದು ಅರ್ಥಪೂರ್ಣವಾಗಿದೆ!

ಇಲ್ಲಿ ನೋಡಿ "ಕೆಂಡಸಂಪಿಗೆ"ಯಲ್ಲಿ ಮುದ್ದು ಬರೆದ "ಮತ್ತೆ ಬಂತಲ್ಲ ಮಳೆ" ಕವಿತೆಯ ಸಾಲುಗಳನ್ನು..
"ಮುಂಗಾರಿನ ಆರಂಭದ ದಿನಗಳಲಿ
ಆರಂಭ ಶೂರನಂತೆ ಅಬ್ಬರಿಸಿ
ಬತ್ತಿ ಬರಡಾದ ಹೊಲ ಬಾವಿ
ನದಿ ಝರಿ ಕೆರೆಗಳ ಹಲ್ಕಿರಿದು ಅಣಕಿಸಿ
ಬರುವುದೇ ಇಲ್ಲವೆಂಬಂತೆ ಹೋದದ್ದು
ಮತ್ತೆ ಬಂತಲ್ಲ ಮಳೆ!...
...ಮಕ್ಕಳು ಶಾಲೆಗೆ ಹೊರಟಾಗಲೇ
ಬಾಣಂತಿ ಕೂಸಿನ ಬಟ್ಟೆ
ಒಣಗಿಸುವಾಗಲೇ
ಮತ್ತೆ ಬಂತಲ್ಲ ಮಳೆ!....
......ರೈತ ನಾಟಿಗೆ ಗದ್ದೆಗಳಲಿ ನೀರಿಗಿಳಿಯುವುದ
ಕಾಯುವ ಹೊತ್ತು
ಬಾಲಕನ ಶವವ ನೀರಿಂದ
ಮೇಲೆಳೆಯುವ ಹೊತ್ತು
ನೀರು ತುಂಬಿದ ಮನೆಗಳಲಿ
ಬಟ್ಟೆ ಪಾತ್ರೆ ತಡಕಾಡುವ ಹೊತ್ತು
ಸೊಂಟಮಟ್ಟ ನೀರಿನಲ್ಲಿ ನಿಂತು
ಬೀಳುವ ಮಾಡಿಗೆ
ಊರುಗೋಲು ನೆಡುವ ಹೊತ್ತು
ಹೊತ್ತು ನೋಡಿಯೇ
ಮತ್ತೆ ಬಂತಲ್ಲ ಮಳೆ! "
///

"ಬಾಣಂತಿ ಕೂಸಿನ ಬಟ್ಟೆ ಒಣಗಿಸುತ್ತಿರುವ" ..."ನೀರು ತುಂಬಿದ ಮನೆಗಳಲಿ..." ...."ಹೊತ್ತು ನೋಡಿಯೇ ಮತ್ತೆ ಬಂತಲ್ಲ ಮಳೆ" ಸಾಲುಗಳಲ್ಲಿನ ಕಲ್ಪನೆ ಅದ್ಭುತ ವಾಗಿದೆ ಅಲ್ವಾ!!

ಮಲೆನಾಡಿನಲ್ಲಿ ಸುಂದರ ಪ್ರಕೃತಿ ಮಡಿಲಿನಲ್ಲಿ ಇದ್ದು ತನ್ನ ವಯಸ್ಸಿನ ಬೇರೆ ಮಕ್ಕಳಂತೆ ಅಲ್ಲದೆ ಪ್ರಪಂಚದ ಆಗುಹೋಗುಗಳನ್ನು, ಸುತ್ತಲಿನ ಪರಿಸರವನ್ನು ಕಾವ್ಯಾತ್ಮಕವಾಗಿ ಪ್ರಬುದ್ಧವಾಗಿ ವರ್ಣಿಸುವ ಕಲೆಯ ಬುದ್ಧಿ ಮುದ್ದುವಿಗೆ ಸಿದ್ಧಿಸಿದೆಯೇನೋ!!

ಉಜ್ವಲ ಭವಿಷ್ಯವನ್ನು ಹಾರೈಸೋಣ!!

------------------------------------------------------------------------------------------

ತೊದಲು

ನಮಸ್ಕಾರ...
ನಾನು ವಿನೋದ್ ರೈ..ವೃತ್ತಿಯಲ್ಲಿ ಇಂಜಿನಿಯರ್ ...

ಸಾಹಿತ್ಯದ ವಿಷಯಕ್ಕೆ ಬಂದಾಗ ತುಂಬಾ ಪುಸ್ತಕ ಓದಿದವನಲ್ಲ..ಆಗಲೇ ಹೇಳಿರುವಂತೆ ಬರೆದುದ್ದೆಲ್ಲಾ ಉತ್ತಮ ಲೇಖನವಾಗದು,ಕವನವಾಗದು ಎಂಬ ಸಾಮಾನ್ಯ ಜ್ಜ್ಞಾನವಿದ್ದರೂ ಬರೆಯಬೇಕೆಂಬ..ಬರೆಯಬಲ್ಲೆನೆಂಬ ಹಂಬಲ ಇತ್ತು..ಬರೆಯುತ್ತಿದ್ದೆ!!!
ಬ್ಲಾಗಗಳನ್ನು ಓದುತ್ತಿದ್ದೆ...ಈಗ ಬ್ಲಾಗ್ ಲೋಕಕ್ಕೆ ಪುಟ್ಟ ಪುಟ್ಟ ಹೆಜ್ಜೆ ಇಡುತ್ತಿದ್ದೇನೆ!
ಪದಗಳ ಪರಿಚಯ ಕಡಿಮೆ..ಗೊತ್ತಿರುವಷ್ಟನ್ನೇ ಉಪಯೋಗಿಸಿ "ಒಂದಿಷ್ಟು" ಬರೆಯಬಲ್ಲೇನೋ ಏನೋ!!
ನಿಮಗೆ ಇಷ್ಟವಾದರೆ ತಲೆ ನೇವರಿಕೆಗೆ...ಇಲ್ಲದಿದ್ದರೆ ಕಿವಿಹಿಂಡಿಸಿಕೊಳ್ಳುವುದಕ್ಕೆ ಸದಾ ಸಿದ್ದನಿದ್ದೇನೆ!!
------------------------------------------------------------------------------------------