ಸ್ವಗತ -1

ಕವಿ ಅಥವಾ ಲೇಖಕ ಅವನವನ ಧಾಟಿಯಲ್ಲೇ ಯೋಚಿಸುತ್ತಾನೆ, ಅಂತೆಯೇ ಬರೆಯುತ್ತಾನೆ, ಅದು ಕೆಲವರಿಗೆ 'ಕಾಲಹರಣ' ಎಂದೆನಿಸಿ ಗೊಣಗಬಹುದು, ಕೆಲವರಿಗೆ 'ತಮಾಷೆ' ಎಂದೆನಿಸಿ ಅಪಹಾಸ್ಯ ಮಾಡಬಹುದು.ಎಲ್ಲರ ದೃಷ್ಟಿಕೋನಗಳು ಬೇರೆ ಬೇರೆಯಾಗಿರುತ್ತವೆ ;ಬರೆದುದನ್ನು ಯಾರೂ ಓದುವುದಿಲ್ಲ ಅಥವಾ ಯಾರಾದರೂ ತಮಾಷೆ ಮಾಡುತ್ತಾರೆ ಎಂದೆಲ್ಲಾ ಅನ್ನಿಸತೊಡಗಿದರೆ ಬರೆಯಲು ಆಸಕ್ತಿಯೇ ಇರುವುದಿಲ್ಲ.ಅಕ್ಷರಮೋಹಿಯಾಗಿ,ಪದಗಳ ಒಲವನ್ನು ಸಂಪಾದಿಸಿ,ಆತ್ಮತೃಪ್ತಿಗಾಗಿ ಬರೆಯುವುದನ್ನು ವಾಡಿಕೆ ಮಾಡಿಕೊಂಡರೆ ಬರೆದ ಎಲ್ಲಾ ಸಾಲುಗಳಲ್ಲೂ ಅತೀವ ಆನಂದ ದೊರೆಯುತ್ತದೆ. ನಮಗೆ ನಿರಂತರ ನೆಮ್ಮದಿ ನೀಡುವುದು ನಮ್ಮತನ ಮಾತ್ರ!
-----------------------------------------------------------------------------------------------------------------------------------------------------
ಕನ್ನಡ ಬ್ಲಾಗ್ ಪುಟದಲ್ಲಿ....(comments @KANNADA BLOG- facebook page)...

ಕವಿಯಾಗಲು..

ಪದಗಳ್ಯಾವುದೂ ಎಂದಿಗೂ ಯಾರದ್ದೋ ಸ್ವಂತಾಸ್ತಿ ಅಲ್ಲ,
ಶೈಲಿಯನುಕರಣೆ ತಪ್ಪಲ್ಲ!
ಯೋಚಿಸಿ ಯೋಜಿಸಿ ಬರೆಯಬೇಕು,ಕೃತಿ ಚೌರ್ಯ ಸಲ್ಲ;  
ಕದ್ದವನೆಂದೂ  ಕವಿಯಾಗಲ್ಲ!

ಬೆದರಿ ಬೆಳಕಿಗೆ,
ಕತ್ತಲಲ್ಲೇ ಕಳ್ಳನ ಬರವಣಿಗೆ!
ಅಲ್ಲೇ ಇರುವುದದು ,
ಬೆಳಕಿನಲಿ ಭೂತಕನ್ನಡಿ ಸುಡುವುದು!

ಭಾವನೆಗಳು ಬೇಕು,
ಧಾವಿಸಿ ಅವುಗಳನನುಸರಿಸಬೇಕು!
ಕಲ್ಪನೆ ಇರಬೇಕು,
ಕೊಂಚ ಅಂತೆಯೇ ಬರೆಯಬೇಕು!

ಸ್ವಂತಿಕೆಯಿರಬೇಕು,
ಕಾವ್ಯ ಶೀಮಂತಿಕೆಯಿರಬೇಕು!
ಮಂತ್ರಿಸುವುದದು,
ಒಮ್ಮೆ ಓದಿರೆಂದು ಆಮಂತ್ರಿಸುವುದದು!
--------------------------------------------------------------------------------------------------------------------------
 ಕನ್ನಡ ಬ್ಲಾಗ್ ಪುಟದಲ್ಲಿ..(comments @KANNADA BLOG- facebook page)... 

ವಿಪರ್ಯಾಸ

         1
ಎದ್ದು ಕುಳಿತೆ ಹರುಷದಲ್ಲಿ,

ಚಂದದೊಂದು ಕನಸ ಕಂಡು;
ಅಂದುಕೊಂಡೆ ಬದುಕಿನಲ್ಲಿ,
ಇಂಥದೊಂದು ಘಟಿಸಲೆಂದು!

           2
ಬಾನಾಡಿಯಾಗಿ ಖುಷಿಯಲ್ಲಿ,

ಹಾರುತ್ತಿರಲು ಅತಿ ಹಿತವಾಯಿತು;

ಕಾರಣ ಹುಡುಕುವುದು ಎಲ್ಲಿ,

ಹೇಗೋ ಕನಸು ಕವಲೊಡೆಯಿತು!

            3

ಮೋಡದ ಮರೆಯಲ್ಲೊಂದು,

ಮರೆಯಾಗಿ ಹೋಯಿತು;

ಬಿಸಿಲಿನತ್ತ ಬಾಗಿ ಇನ್ನೊಂದು,

ಬಸವಳಿದು ಬಾಡಿ ಹೋಯಿತು!

----------------------------------------------------------------

ವಿರಹ...ಹೃದಯದ ಹೊರಳಾಟ!

ಪ್ರೇಮವಂಚಿತ ಹುಡುಗಿ ,ವಿಧಿಯನ್ನು ಶಪಿಸುತ್ತಾ ಹೇಳಿದ ಅವಳ ಜೀವನದ ಕಥೆಯ ಕವನವಿದು!
--------------------------------------------------------------------------------------------

ಮೃದುಲ ಹೃದಯದ ಮೇಲೆ,ಚೂಪಾದ ಉಗುರಿನ ಗೀರು,
ಹುಚ್ಚು ಪ್ರೀತಿಯಿಂದ;
ಮಾಸದ ಗಾಯದ ಮೇಲೆ, ಸುರಿದಂತೆ ಉಪ್ಪಿನ ನೀರು..
ನೆನಪ ನೋವಿನಿಂದ!     ||ಪ||

ವಿಷಗಾಳಿಯ ಉಸಿರಾಟ,
ಧರೆಗುರುಳಿ ಧಗಧಗನೆ,
ಹೊತ್ತಿ ಉರಿಯುತಿದೆ ಕನಸ ಗೋಪುರ.
ಒಂದೆಂಬ ಬಂಧವನು ವಿಧಿ ಹಾಳುಮಾಡಿ,
ರಮಿಸುತಿದೆ ಕಣ್ಣೀರಿನಲ್ಲೇ ಸ್ನಾನ ಮಾಡಿ!  || ೧||

ವಿಷಮ ಪ್ರೀತಿಯಾಟ,
ಮರುಕದಲಿ ಮನಸಿನಲಿ,
ತುಂಬಿ ಹರಿಯುತಿದೆ ದುಃಖದ ಸಾಗರ.
ಶೋಕಲೋಕದಲ್ಲಿ ಏಕಾಂಗಿ ಪಯಣ,
ದಾರುಣ ಕೊನೆಯ ಕಥೆಯಿದು ಜೀವನ!   ||೨||











  ಚಿತ್ರ ಕೃಪೆ :www.wallpaperhere.com

 -------------------------------------------------------------------------------------------------------

ಕನ್ನಡ ಬ್ಲಾಗ್ ಪುಟದಲ್ಲಿ..comments @KANNADA BLOG- facebook page)... 

ಹೀಗೊಂದು ಕವಿತೆ ...

ಸುಲಭ ಮತ್ತು ಇಷ್ಟ,

ಹಠಮಾರಿ ಪ್ರೇಯಸಿಯನ್ನು  ಸಂತೈಸುವುದು.
ಆದರೆ ಬಲು ಕಷ್ಟ,
ಕೋಪಿಸಿಕೊಂಡ ಪದಗಳನ್ನು ಸಮಾಧಾನಿಸುವುದು!

ಸುಮ್ಮನೆಂದರೆ ಹೇಗೆ ನಂಬುವುದು
ಓದಿದರೆ ನಿಮಗೇ ತಿಳಿಯುವುದು!

ಬಿಳಿಹಾಳೆ ,ಲೇಖನಿ ಹಿಡಿದು ಕೂತಾಗ,
ಯೋಚಿಸಿ,ಕಲ್ಪಿಸಿ ಬರೆಯಲನುವಾದಾಗ,
ನನಗೆ ಪ್ರತಿ ಪದಗಳ ಬೆಲೆ ತಿಳಿಯುವುದು;
ದೂರವೇ ಇರುತ್ತವೆ ಕರೆದಾಗ,
ಪರಿಚಯವಿರದವರಂತೆ!!

ಸ್ವಲ್ಪದಿನ ನಾನೇನೂ ಬರೆದಿಲ್ಲ ನಿಜ,
ಹಾಗೆಂದು ಕೋಪ ಬರುವುದು ಸಹಜ,
ಮುಂದೆ ಹೀಗಾಗದು ದಯಮಾಡಿ ಮನ್ನಿಸಿ;
ಎಂದು ನಾ ಬೇಡಲು ಸುಮ್ಮನಿದ್ದವು,
ಕಿವಿಕೇಳದವರಂತೆ!

ಕಾದೆನು ಸ್ವಲ್ಪ ಕರೆಂಟು ಹೋದ ಕತ್ತಲಲ್ಲಿ,
ಮತ್ತೆ ಪ್ರಯತ್ನಿಸಿದೆ ಮೇಣದ ಬತ್ತಿಯ ಬೆಳಕಿನಲ್ಲಿ,
ಬೆಳಕಿದ್ದರೂ ಸುತ್ತಲೂ ನನ್ನೊಳಗೆ ಕತ್ತಲು.
ಖುಷಿ ಕಸಿದುಕೊಂಡು ಪದಗಳೆಲ್ಲಾ ನಗುತ್ತಿರಲು
ಅಳು ಬಂದಂತಾಯಿತು!

ಎದ್ದೊಮ್ಮೆ ಹೋಗಿ ಕನ್ನಡಿಯ ನೋಡಿದೆ,
ನಿಜವೇ ಇದು,ನನ್ನ ಕಣ್ಣು ಕೆಂಪಾಗಿದೆ.
ಬಲು ಸುಲಭದ ಕೆಲಸ ಎಂದಿದ್ದ ನಾನೇ
ಬರೆಯಲಾರದೆ ಹೋದೆ  ಬೇಕೆನಿಸಿದಾಗ,
ಎಂಥ ವಿಪರ್ಯಾಸ!!

ಸಂತೈಸುವ ಕೆಲಸ ಮುಂದುವರೆಸಿದೆ
ಪದಗಳ ಪ್ರಶ್ನೆಗಳಿಗೆಲ್ಲಾ ಉತ್ತರಿಸಿದೆ.
ನಮ್ಮ ಮರೆಯುವಿಯೇನು?ಉಹುಂ ಇಲ್ಲ,
ಅಹಂ ಇದೆಯೇನು?ಉಹುಂ ಇಲ್ಲ,
ಹೀಗೆ..ಸಾಗಿತ್ತು!

ಹಾಗೂ ಹೀಗೂ ಪದಗಳಿಗೆ ಸಮಾಧಾನವಾಯ್ತು,
ನನ್ನ ಸೋಮಾರಿತನದ ಪರಮಾವಧಿಗೆ ಶಿಕ್ಷೆಯಾಯ್ತು;
ಲೇಖನಿಗೇಕೆ ಪ್ರಸವ ವೇದನೆ ಎಂದು
ಪದಗಳು ತಾವಾಗಿಯೇ ಬಂದು,
ಕೂತವು ಸಾಲಿನಲ್ಲಿ !

ನಮ್ಮ ಹೆಚ್ಚು ಹೊಗಳದಿರು ಎಂಬ ಮಾತು ಪಡೆದು,
ಒಲವಿನಲಿ ಕರೆದಾಗ ಮತ್ತೆ ಬರುವೆವೆಂದು,
ಕಿವಿ ಹಿಂಡಿ ನುಡಿದವು ಪದಗಳೆಲ್ಲಾ ಒಟ್ಟಿನಲ್ಲಿ,
ಚಿಕ್ಕ ಮಗುವಿನಂತೆ ಎಲ್ಲದಕ್ಕೂ,
ಸರಿಯೆಂದೆ ನಾನು!

ಮೇಣ ಮುಗಿದು ದೀಪ ಆರಿತು,
ಮಧ್ಯ ರಾತ್ರಿ ,ಎಲ್ಲೆಲ್ಲೂ ಕತ್ತಲು,
ನನ್ನೊಳಗೆ ಮಾತ್ರ ಬೆಳಕು!

ಚಿತ್ರ ಕೃಪೆ: www.flickr.com







 
-----------------------------------------------------------------------------------------------

ಅಮ್ಮ ಬೇಕಾಗಿದ್ದಾರೆ(ಳೆ)!!

ಅಳುತ್ತಾ ಜಳಕ ಮಾಡುವಾಗ,
ಜಿಗಿದು  ಬೆತ್ತಲೆ ಓಡುವಾಗ,
ಪ್ರೀತಿಯೇಟು ಕೊಟ್ಟಿದ್ದೆ ;
ಬಿದ್ದಷ್ಟೂ ಬಾರಿ,
ನನ್ನೆಬ್ಬಿಸುತ್ತಿದ್ದೆ.
ಈಗ ಮಾತ್ರ ಸುಮ್ಮನಿದ್ದೀಯ!
ನಾನು ದೊಡ್ದವನಾಗಬಯಸಿದ್ದು ನಿಜ;
ಆದರೆ ಈಗ ಮಗುವಾಗುವಾಸೆ ..
ಎಂಥ ವಿಪರ್ಯಾಸ!!

ಹಸಿವಿದ್ದರೂ..ಇರದಿದ್ದರೂ,
ಉಣಿಸುತ್ತಿದ್ದೆ ನನಗೆ,
ತೋರಿಸಿ ಗುಬ್ಬಿ ,ಗಿಣಿ,ಚಂದಮಾಮನನ್ನು!!
ಓದಿ ಸುಸ್ತಾಗಿ ಈಗ...
ದೊಡ್ಡ ಪುಸ್ತಕವೇ ತಲೆದಿಂಬು!!
ಭಾಸವಾಗುತಿದೆ ನಿದ್ದೆಯಿಂದೆಬ್ಬಿಸಿ ನೀನು..
ಊಟಕೆ ಬಾ ಎಂದು ಕರೆದಂತೆ!!

ಬೇಡವೆಂದರೂ ಮಳೆಯಲ್ಲಿ ನೆಂದು.
ಮರುದಿನ ಜ್ವರ,ನೆಗಡಿ..
ಬಯ್ಯುತ್ತಾ ನೀನು,
ಸಿಂಬಳ ಸುರಿವ ಮೂಗನೊರೆಸಿದ್ದು;
ನಾ ನಿನ್ನ ನಿದ್ದೆಗೆಡಿಸಿದ್ದು!!
ಎಲ್ಲಾ  ನೆನಪಾಗುತಿದೆ.
ಆಗ ಎಲ್ಲವನ್ನೂ ನೋಡುತ್ತಿದ್ದೆ,
ಬೆರಗುಗಣ್ಣಿನಿಂದ..
ಈಗ ನೀನೇ ವಿಸ್ಮಯ!!

ಮನೆ ಬಿಟ್ಟು ಹೊರಟಾಗ,
"ಜೋಪಾನ ಕಂದಾ..."ಎಂದು ನೀನಂದಿದ್ದು;
ನಂಗೆ ಅಷ್ಟೇನೂ ಗಂಭೀರವಾಣಿಯಾಗಿರಲಿಲ್ಲ.
ಆಚೆ ಬರುವ ಖುಷಿಯಲ್ಲಿ,
ಬೇರೆಲ್ಲಾ ಗೌಣವಾಗಿತ್ತು !!
ಗುರುತಿಸದೇ ಹೋದೆನಾನು;
ನಿನ್ನ ಕಣ್ಣ ಬಿಂದುವನ್ನು..!

ಪ್ರೀತಿಗೆ ಬರಬಂದಿದೆ,
ನಿನ್ನ ನೆನಪಾಗುತಿದೆ.
ರಚ್ಚೆ  ಹಿಡಿದು,
ರಪರಪನೆ ನಿನ್ನೆದೆಗೆ ಬಡಿದು;
ರಂಪ ಮಾಡಲಾರೆ ಅಂದಿನಂತೆ!
ನಿನ್ನ ಮಡಿಲಲ್ಲಿ ಒರಗಬೇಕೆನಿಸುತಿದೆ...
ಕೋಪ ಇಲ್ಲ ತಾನೇ!?
-------------------------------------------------------------------------------------------------------------------

ಕನ್ನಡ ಬ್ಲಾಗ್ ಪುಟದಲ್ಲಿ..(comments @KANNADA BLOG- facebook page)... 

ನೆನಪುಗಳು ಮಾತ್ರ ಮಧುರ

ತುಂಬಾ ಧನ್ಯವಾದ ನೆನಪುಗಳಿಗೆ!!!

ಜೊತೆಯಲಿ ನೀನು ಇರದಿರುವಾಗ
ನಿನ್ನನು ನನ್ನಲೇ..ನನ್ನನು ನಿನ್ನಲೇ ಹಿಡಿದಿಡಲು ಸಹಕರಿಸುವುದಕ್ಕೆ!!

ನಿನ್ನ ಚಿತ್ರದ ಮುಖದಲ್ಲಿ ನಾನು ಮೀಸೆ ಬರೆಯುವಾಗ..
ನೀನು ದಿಟ್ಟಿಸಿ ನೋಡಿದ್ದು ..ಅಟ್ಟಿಸಿಕೊಂಡು ಬಂದದ್ದು

ನಿನ್ನ ಅಂಗೈಯಲ್ಲಿ ನಾನು ಮದರಂಗಿ ಹಚ್ಚೆ ಹಾಕುವಾಗ..
ಭುಜ ತಾಗಿಸಿ ಕೂತಿದ್ದು ...ಕಣ್ಣು ಮಿಟುಕಿಸಿ ನಕ್ಕಿದ್ದು...

ಕನ್ನಡಿಯ ಮುಂದೆ ನೀನು ನೆಟಿಕೆ ಮುರಿಯುವಾಗ
ಕದದ ಹಿಂದೆ ನಿಂತು ..ತಿಳಿಯದಂತೆ ಕದ್ದಾಲಿಸಿದ್ದು..

ಸತಾಯಿಸಲು ನಾನು ಸುಮ್ಮನೆ ಸುಳ್ಳು ಹೇಳಿ ನಕ್ಕಾಗ . 

ನಿನ್ನ  ಮುಖ ಬಾಡಿದ್ದು..ನೀನು ಬೆನ್ನು ತಿರುಗಿಸಿದ್ದು ..

ಎಲ್ಲಾ ದೃಶ್ಯಗಳೂ ತೇಲಿ ಬರುತಿವೆ,
ಒಂದರ ಹಿಂದೆ ಒಂದರಂತೆ!!

ತಿರುತಿರುಗಿ ನೆನೆನೆನೆದು ಆ ಘಳಿಗೆ..

ಹೇಳುತ್ತಿರುವೆ ಧನ್ಯವಾದ ನೆನಪುಗಳಿಗೆ!
--------------------------------------------------------------------------------------------------------------------------------------
ಕನ್ನಡ ಬ್ಲಾಗ್ ಪುಟದಲ್ಲಿ..(comments @KANNADA BLOG- facebook page)...